GHG emission monitoring gipahigayon sa DENR Caraga

Gipahigayon sa DENR ning rehiyon sa Caraga ang duha ka adlaw nga Geenhouse Gas Emission Monitoring Workshop sa miaging semana, Marso 3 hangtod sa 4, 2021 pinaagi sa blended face-to-face ug virtual nga sistema sa panagtagbo.

Sa iyang pakigpulong sa opening program sa maong workshop, si DENR Caraga Regional Executive Director Nonito M. Tamayo nagkanayon nga ang pagmonitor ug pag-imbentaryo sa greenhouse gas emission maoy tukma sa panahon tunod kay pinaagi niini, atong ma-analisar kung unsay atong nahimo sulod sa pipila ka tuig ug atong makita ug matino kung unsa pa ang atong mahimo aron makunhuran o ma-offset ang atong GHG emission tungod kay daghan sa katawhan karon dinhi sa Pilipinas ug sa ubang nasod ang nag-atubang sa mga isyu kalabot sa climate change.

Ang maong workshop gihimo agig pagtuman o compliance  sa commitment sa nasod sa Pilipinas sa Brunei-Indonesia-Malaysia-Philippines East ASEAN Growth Area o BIMP-EAGA Project Strategy.

Ang  workshop gitumong usab sa paghatag ug kapasidad sa mga DENR Greenhouse Gas o GHG focal persons sa tibuok rehiyon kung unsaon pagkwenta  ang GHG emission pinaagi sa natigom nila nga data sa ilang tagsa-tagsa ka buhatan ug kung unsay  gidaghanon sa GHG ang ma-contribute matag buhatan sa  DENR sulod sa rehiyon ug sa pagtino kung unsa nga matang sa emission ang mas daghan nga naamot o na-contribute sa maong mga buhatan kalabot na sa fuel consumption, purchased electricity ug official business travels. 

Ang maong workshop gihimo sa pakigtambayayong sa Environmental Management Bureau Caraga.##

• Prev
• Next